Rusiyanın keçmiş Prezidenti Avropa İttifaqının (Aİ) Ukraynaya təhlükəsizlik zəmanəti vermək niyyətindən qəzəblənib. O hesab edir ki, bu sənəd heç nəyə dəyməz, lakin hüquqi baxımdan Ukraynanın hansısa Avropa ölkəsi və ya ölkələri ilə hərbi əməkdaşlıq sazişi imzalaması üçün bir fürsətdir. “NATO modeli budur: hücum etməyəcəyik, Rusiya ilə müharibə istəmirik, amma özümüzü heç nədən məhrum etməyəcəyik. Rusiya həmin hərbi bazanı vuranda - bu isə mütləq baş verəcək, çünki əsgərlər bizə qarşı döyüşmək üçün oraya gələcəklər - alyans ölkələri NATO üzvü olan ölkənin bazasının dağıdılmasına görə kollektiv cavab verməyə hazır olacaqlarmı?”, - deyə Medvedyev bildirib.
Hamıya məlumdur ki, Medvedyev hətta Rusiya Federasiyasının Prezidenti vəzifəsində belə müstəqil fiqur deyildi və Milad günü yazısının faktiki müəllifi, şübhəsiz, Vladimir Putindir. Üstəlik, söhbət Rusiya-NATO qarşıdurmasından, buna görə də nüvə müharibəsi ehtimalının yüksək olmasından getdiyi üçün son dərəcə təhlükəli olan mövzu AİB və MDB-nin Sankt-Peterburqda keçirilən qeyri-rəsmi sammiti ərəfəsində açıqlanır.
Təbii olaraq Rusiya Xarici İşlər Nazirliyi bunları və ya bunlardan daha kobud demarşları həll edir, əksər hallarda həll edirmiş kimi təəssürat yaradır. Buna görə də Medvedyevin Sankt-Peterburqda görüşən AİB və MDB ölkələrinin liderlərinə NATO və ya onun üzvü olan hər hansı bir ölkəyə hücumun qaçılmazlığı barədə bəyanatla nə demək istədiyi son dərəcə maraqlıdır.
Bu, ən vacib məsələdir, çünki Ermənistan da MDB-nin üzvüdür, lakin onun ərazisində Fransanın timsalında qərb silahları mövcuddur. İrəvan açıq şəkildə deyir ki, ordusunu Qərb standartlarına gətirir, Fransa isə NATO ilə eynidir. Fransanın Qafqazda möhkəmlənməsi Rusiyanı təhdid etmirmi? Əgər NATO müttəfiqi olan Ukrayna Rusiya üçün təhlükədirsə, Ermənistan təhdid olmayacaq?
Söhbət kiminsə Rusiya-Ermənistan, hətta Rusiya-Fransa müharibəsi istəməsindən getmir. Məsələ burasındadır ki, Medvedyev MDB-nin qeyri-rəsmi sammiti ərəfəsində bu qədər tutqun perspektiv qurmaqla nəyi nəzərdə tutur? Rusiya-NATO qarşıdurması qaçılmazdır? Moskva Ukraynadan sonra “orbit”indən aralanan ölkələri tabe edir, yoxsa sadəcə olaraq “buxar buraxır”? Bəs AİB liderlərini Peterburqa dəvət etmək və nahardan əvvəl süfrəyə xardal vermək nə deməkdir? Ukrayna bibər arağı artıq keçmir...?
Asif Cəfərov
Ordu.az
